امریکا کو ہندوستان میں مذہبی آزادی کی صورتحال پر تشویش

واشنگٹن : امریکا نے بین الاقوامی مذہبی آزادی کی سالانہ رپورٹ میں ہندوستان کی صورتحال کو تشویشناک قرار دیا ہے۔ امریکی وزیرخارجہ انٹونی بلنکن نے کہا ہے کہ ہندوستان میں نفرت انگیز تقاریر اور مخالف تبدیلی مذہب قوانین کے نفاذ، اقلیتوں کے مکانات اور عبادت گاہوں کے انہدام میں تشویشناک اضافہ ہوا ہے۔ رپورٹ میں کہاگیاکہ سینئر امریکی عہدیدارہندوستانی ہم منصبوں کے ساتھ مذہبی آزادی پر اظہار تشویش کرتے رہے ہیں۔ رپورٹ میں کہا گیاہے کہ دس صوبوں میں تمام مذاہب کی تبدیلی کو روکنے سخت قوانین نافذ ہیں۔ ان میں بعض صوبے شادی کے مقصد سے جبری تبدیلی مذہب پر جرمانے بھی عائد کرتے ۔ امریکی وزیرخارجہ نے کہا کہ اس وقت دنیا بھر کے لوگ مذہبی آزادی کا تحفظ کرنے کیلئے سخت محنت کررہے ہیں۔ واضح رہے کہ ہندوستان نے پہلے ہی انسانی حقوق پر امریکی اسٹیٹ ڈپارٹمنٹ کی سالانہ رپورٹ کو مسترد کر دیا تھا اور کہاتھا کہ یہ رپورٹ غلط معلومات اور غلط فہمی پر مبنی ہے۔