امریکا کا قطر سے حماس کو نکالنے کا مطالبہ، قطر کی آمادگی

دوحا: امریکا کے دباؤ پر قطر نے حماس کو ملک بدر کرنے پر آمادگی ظاہر کردی ہے۔ امریکی نیوز چینل سی این این نے قطر اور امریکا کے ذرائع کے حوالے سے بتایا ہے کہ حماس کے ساتھ جنگ بندی اور یرغمالیوں کی رہائی کے معاہدے کیلئے کئی ماہ کی ناکام کوششوں کے بعد امریکا نے قطر پر حماس کو نکالنے پر زور دیا۔ امریکا کی جانب سے قطر کو واضح پیغام دیا ہے کہ دوحا میں حماس قیادت کی موجودگی کو مزید قبول نہیں کیا جائے گا۔ امریکا کے ایک سنیئر اہلکار نے بتایا کہ حماس ایک دہشت گرد گروہ ہے جس نے امریکیوں کو ہلاک کیا ہے اور امریکیوں کو یرغمال بنائے رکھا ہے۔امریکی اہلکار کے مطابق قطر پر واضح کیا گیا ہے کہ یرغمالیوں کی رہائی کی تجاویز بار بار مسترد کرنے کے بعد امریکی اتحادی کسی ملک میں حماس کے رہنماؤں کا خیرمقدم نہیں ہونا چاہیے۔