Raza Musani 
تہران: ایران نے نو منتخب صدر ڈونلڈ ٹرمپ سمیت سابق اور موجودہ امریکی حکام کے قتل کی سازش میں ملوث ہونے کے الزامات کو مسترد کردیا۔ ایرانی وزارت خارجہ کے ترجمان اسماعیل بقائی نے نیوز بریفنگ میں امریکی دعوؤں کو مکمل بے بنیاد قرار دیا۔ انہوں نے سابقہ الزامات کا حوالہ دیتے ہوئے انہیں اسرائیل اور ایران مخالف دھڑوں کی قابل نفرت سازش سے تعبیر کیا۔ ترجمان کا کہنا تھا کہ جس کا مقصد امریکہ اور ایران کے درمیان معاملات کو مزید پیچیدہ بنانا ہے۔ انہوں نے کہا کہ ایران اپنی قوم کے حقوق کے دفاع کے لیے ملکی اور بین الاقوامی سطح پر تمام جائز اور قانونی ذرائع استعمال کرے گا۔ یہ بیان امریکا میں ٹرمپ پر حملے کی مبینہ سازش کے الزام میں گرفتار فرہاد شاکر پر فرد جرم عائد ہونے کے بعد سامنے آیا ہے۔
