ایم ڈبلیو ایم سے کرم کی سیٹ چھینی گئی تو سڑکوں پر احتجاج کرینگے، علامہ مزمل حسین

پارا چنار: مجلس وحدت مسلمین کرم کے ضلعی صدر و تحصیل چیئرمین علامہ مزمل حسین فصیح نے اپنے ایک بیان میں کہا ہے کہ الیکشن کمیشن نے تحریک انصاف کے حمایت یافتہ اور مجلس وحدت مسلمین کے ایم این اے انجینئر حمید حسین کے خلاف دوبارہ گنتی کا فیصلہ دے کر ثابت کیا کہ وہ کسی صورت بھی مجلس وحدت مسلمین کے ایم این اے سے سیٹ چھیننا چاہتا ہے، جو کرم کے عوام کو کسی بھی صورت میں قبول نہیں ہوگا، الیکشن کمیشن کے کسی بھی بھونڈے اقدام کے خلاف کرم کے شیعہ سنی عوام اپنا احتجاج کا قانونی حق محفوظ رکھتے ہیں، اگر الیکشن کمیشن نے اپنے غیر آئینی احکامات واپس نہ لئے تو ہم سڑکوں پر نکل کر شدید احتجاج کرینگے۔ انہوں نے کہا کہ الیکشن میں ہر قسم کی دھاندلی اور فارم 45 میں تبدیلی کے باوجود انجینئر حمید حسین بھاری اکثریت سے جیتے ہیں، مگر بعض قوتوں کو ایم ڈبلیو ایم کی یہ کامیابی ہضم نہیں ہو رہی، ہم حکام بالا سے مطالبہ کرتے ہیں کہ کرم میں امن و امان کا ایک بہترین موقع میسر آیا ہے، جسے گنوانا علاقے و ملکی صورتحال کے لیے مناسب نہیں ہوگا، لہذا امن و امان کو قائم رکھنے کے لئے ایسے کسی بھی غلط اور غیر دانشمندانہ اقدام سے گریز کیا جائے۔