Ilyas 
ایک ضعیف اور بچے
ایک بوڑھا آدمی وضو کر رہا تھا لیکن صحیح طریقے سے وضو کرنا نہیں جانتا تھا۔ امام حسن(ع) اور امام حسین(ع) کی عمر اس وقت کم تھی۔ انہوں نے اس بوڑھے آدمی کو وضو کرتے ہوئے دیکھا۔ اس میں کوئی شک نہیں کہ جاہل کو احکام اور مسائل کی تعلیم دینا واجب ہے۔ بوڑھے آدمی کو صحیح وضو سکھانا ضروری تھا لیکن اگر اس سے بلا واسطہ یہ کہا جاتا کہ تمہارا وضو صحیح نہیں ہے تو یہ اس کے لیے رنجیدگی کا سبب بنتا اور یہ بات ہمیشہ کے لیے اس کے دل میں رہ جاتی۔ کیا پتہ وہ اس بات کو اپنی توہین محسوس کرتا اور کسی طرح اس بات کو قبول کرنے کو تیار نہ ہوتا۔
ان دونوں بچوں نے سوچا کہ براہ راست ان سے نہ کہا جائے۔ انہوں نے آپس میں بحث کرنی شروع کر دی جس کو ضعیف شخص سن رہا تھا۔ ایک نے کہا: میرا وضو صحیح ہے تو دوسرے نے کہا: نہیں! میرا وضو صحیح ہے۔
اس کے بعد دونوں اس بات پر راضی ہو گئے کہ بوڑھے شخص کے سامنے وضو کیا جائے اور ان سے فیصلہ کروایا جائے کہ کس کا وضو درست ہے۔ جب دونوں نے ایک جیسا وضو کیا تو بوڑھا شخص متوجہ ہوا کہ صحیح وضو کیسے ہوتا ہے۔ اس نے اپنی فراست سے سمجھ لیا کہ دونوں کا اصلی مقصد کیا تھا؟ ان کی بے لوث محبت، ہوش اور ذہانت سے متاثر ہو کر اس نے کہا: تم دونوں کا وضو صحیح اور کامل ہے۔ میں بوڑھا اور نادان ابھی تک صحیح وضو کرنا نہیں جانتا ہوں۔
