واشنگٹن : امریکی نائب صدر جے ڈی وینس نے کہا ہے کہ ایران کے خلاف جنگ کو طویل تنازع نہیں بننے دیا جائے گا اور امریکا ایران میں 10 یا 15 سال تک فوجی کارروائیوں میں مصروف رہنے کا ارادہ نہیں رکھتا۔ امریکی ٹی وی چینل فاکس نیوز کو انٹرویو دیتے ہوئے جے ڈی وینس نے کہا کہ ایران کا جوہری پروگرام امریکا کے لیے خطرہ ہے تاہم امریکی انتظامیہ اس معاملے کو ایسی جنگ میں تبدیل نہیں ہونے دے گی جو برسوں تک جاری رہے۔ جے ڈی وینس کا کہنا تھا کہ امریکا ایران میں 10 یا 15 سال کی طویل فوجی وابستگی کا ارادہ نہیں رکھتا بلکہ یہ معاملہ دو سال تک بھی نہیں چلنا چاہیے۔ امریکی نائب صدر نے مزید کہا کہ امریکا نے عوام سے وعدہ کیا ہے کہ وہ غیر معینہ مدت تک وہاں موجود نہیں رہے گا۔ ان کا کہنا تھا کہ انہیں مکمل اعتماد ہے کہ صدر ڈونلڈ ٹرمپ اس معاملے سے امریکا کو اچھے نتائج کے ساتھ باہر نکالیں گے۔
جے ڈی وینس نےکہا جنگی سازوسامان کیلئے دیگر ممالک پر انحصار شرمناک ہے، امریکی دفاعی صنعت کو دوبارہ مضبوط بنایا جائے گا، قومی سلامتی کا تقاضا ہے کہ امریکا اپنا اسلحہ خود تیار کرے، ڈیموکریٹس نے امریکی فوج میں سرمایہ کاری کم کی، قومی سلامتی اور دفاع کو مزید بہتر بنایا جائے گا۔


































