Raza Musani 
ریاض : سعودی ولی عہد شہزادہ محمد بن سلمان نے غزہ میں جنگ کو فوری طور پر روکنے کا مطالبہ کیا ہے۔ شہزادہ محمد بن سلمان نے حج کے لیے آئے اہم عالمی رہنماؤں کے اعزاز میں استقبالیہ دیا اس موقع پر خطاب میں سعودی ولی عہد نے کہاکہ اس وقت فلسطین اور غزہ کا مسئلہ فوری حل طلب مسئلہ ہے۔ ہم غزہ میں انسانی جانوں کا ضیاع روکنے اور قتل عام روکنے کا مطالبہ کرتے ہیں۔ شہزادہ محمد بن سلمان نے سلامتی کونسل کی طرف سے غزہ میں فوری جنگ بندی کی حالیہ قراردادوں پر عمل درآمد کی اہمیت پر زور دیا۔ انہوں نے عالمی برادری سے مشرقی یروشلم پر مشتمل 1967ء کی سرحدوں پر مشتمل آزاد فلسطینی ریاست کو تسلیم کرنے کے مطالبے کی تجدید کی۔ سعودی ولی عہد نے واضح کیا کہ خطے میں پائیدار امن کے حصول کے لیے مسئلہ فلسطین کا منصفانہ حل ضروری ہے۔ آزاد فلسطینی ریاست کے قیام کے بغیر خطے میں امن کا حصول ناممکن ہے۔
