لاہور میں 5 ہزار 235 مجالس، 650 جلوس برآمد ہونگے

لاہور: ڈی آئی جی آپریشنز لاہور سہیل چودھری کی زیر صدارت اہم اجلاس منعقد ہوا۔ اجلاس میں محرم کےحوالے سے انتظامات کا جائزہ لیا گیا۔ اجلاس میں اہل تشیع رہنماؤں، لائسنس ہولڈرز، امن کمیٹی کے اراکین سمیت ایس ایس پی آپریشنز مستنصر فیروز، ایس پی سیکیورٹی و دیگر افسران نے شرکت کی۔ ڈی آئی جی نے کہا کہ لاہور شہر میں مجموعی طور پر 5 ہزار 235 مجالس منعقد ہوں گی جبکہ عزاداری کے 650 جلوس برآمد ہونگے۔ ڈی آئی جی آپریشنز کا کہنا تھا کہ یکم محرم تا یومِ عاشورہ 9 ہزار سے زائد افسران و اہلکار سیکیورٹی ڈیوٹی سرانجام دیں گے۔ انہوں نے کہا کہ بانیان مجالس اور جلوس کے منتظمین پولیس کیساتھ تعاون کریں۔ انہوں نے کہا کہ پولیس کیساتھ ساتھ امام بارگاہوں کے رضا کار اور اسکاوٹس بھی سیکیورٹی فرائض سرانجام دیں گے۔ ڈی آئی جی کا کہنا تھا کہ امام بارگاہوں کے اسکاوٹس اور رضا کاروں کو پولیس لائن میں خصوصی تربیت بھی دی جائے گی۔