غاصب اسرائیلی فوج کے غزہ اور رفح میں 45 فضائی حملے، 42 فلسطینی شہید

غزہ: اسرائیلی فوج نے غزہ اور رفح میں پینتالیس سے زائد فضائی حملے کیے ہیں جس میں بیالیس افراد شہید ہوگئے۔ فلسطینی وزارت صحت کے مطابق اسرائیلی فوج نے صبح سے غزہ اور رفح پر شدید بمباری کی ہے۔ اسرائیلی فوج کے حملوں میں درجنوں فلسطینی شہید اور زخمی ہوگئے ہیں۔ اسرائیلی فوج نے مغربی رفح میں بھی فوجی آپریشن شروع کردیا ہے۔
فلسطینی وزارت صحت کے مطابق اسرائیلی فوج وسیع پیمانے پر عمارتوں کو تباہ اور فلسطینیوں کو شہید کرنا چاہتی ہے۔مغربی رفح پر حملے سے لاکھوں فلسطینیوں کے دربدر ہونے کا امکان ہے۔ اقوام متحدہ کے مطابق غزہ میں پہلے ہی بارہ لاکھ سے زائد افراد دربدر ہیں۔ مغربی رفح پر حملے سے پناہ گزینوں کا نیا بحران پیدا ہوگا۔ اسرائیلی فوج نے تاحال حملے کی تصدیق نہیں کی ہے لیکن مغربی رفح کے قصبے العالم کے شہریوں کے مطابق اسرائیلی فوج نے انہیں علاقہ چوبیس گھنٹوں میں خالی کرنے کا حکم دیا ہے۔ دوسری طرف اسرائیلی فوج نے المواشی پر بھی زمینی، فضائی اور بحری راستوں سے بمباری کی ہے۔المواشی میں ہزاروں فلسطینی پناہ لیے ہوئے ہیں۔
اقوام متحدہ نے غزہ میں پناہ گزینوں کے بحران کو سنگین قرار دیتے ہوئے فوری طور پر پناہ گزینوں کے لیے محفوظ مقامات کے قیام کا مطالبہ کیا ہے۔