Raza Musani 
غزہ : غزہ اور لبنان پر صیہونی جنگی طیاروں نے آج بھی بم گرائے اور ڈرون سے حملے کئے۔ تازہ حملوں میں امدادی کارکن سمیت سترہ افراد شہید ہوگئے۔ غزہ کے علاقے بیت لاہیہ میں جنگی طیاروں نے رہائشی عمارت کو ملیا میٹ کردیا۔ حملے میں بچوں سمیت چار افراد شہید اور کئی زخمی ہوگئے۔ جبالیہ میں ڈرون نے مکان کو نشانہ بنایا جس میں تین فلسطینی جان سے گئے۔ شجاعیہ میں خیمہ بستی پر حملے میں کئی فلسطینی زخمی ہوگئے۔غزہ میں چوبیس گھنٹوں میں شہدا کی تعداد اٹھائیس ہوگئی ہے۔
لبنان میں صیہونی جنگی طیاروں نے ضلع طائر میں ایک بار پھر طبی عملے پر حملہ کردیا۔ جس میں ایک رضاکار شہید اور سات زخمی ہوگئے۔ مغربی بکا میں بھی دو حملے گئے جس میں قیمتی جانیں گئیں ۔ گذشتہ روز شہری دفاع کے دو مراکز پر حملے میں 12 امدادی کارکن مارے گئے تھے۔
