پاکستان نے مسلم دنیا میں کردار کا نادر موقع کھودیا،مشاہد سید

مہا تیر اور اردوان کے اسلامی دنیا سے متعلق وژن کو خوش آمدید کہنا چاہئے
کراچی (نیوز ڈیسک) چیئرمین اسٹینڈنگ کمیٹی امور خارجہ برائے سینیٹ سینیٹر مشاہد حسین سید نے کہا ہے کہ کوالالمپور کانفرنس میں شرکت نہ کر کے پاکستان نے مسلم دنیا میں کردار ادا کرنے کا نادر موقع کھودیا، کانفرنس سے متعلق عرب ممالک کی تشویش بجا نہیں، ڈاکٹر مہاتیرمحمد اور طیب اردوان کے اسلامی دنیا سے متعلق وژن کو خوش آمدید کہنا چاہئے،حکومت کو خارجہ پالیسی پر کسی ملک کے دباؤ میں آنے کے بجائے اسٹینڈ لینا چاہئے،انہوں نے کہا کہ، امریکا افغانستان سے نکل نہیں رہا وہ صرف طالبان سے جنگ بند ی چاہتا ہے، امریکا افغانستان میں اپنے اڈوں سے پاکستان، چین اور ایران پرنظر رکھنا چاہتا ہے،امریکی انتخابات اور ٹرمپ کے مواخذے کی وجہ سے اگلے سال پاکستان پر امریکی دباؤ بھی نہیں ہوگا۔