خاشقجی کیس، بن سلمان کو امریکی عدالت کا سمن جاری

منگیتر کی درخواست پر کارروائی، مقصد سعودی حکومت کو بھی ذمہ دار ٹہرانا ہے
واشنگٹن(نیوز ڈیسک) امریکی عدالت نے سعودی صحافی جمال خاشقجی کے قتل میں ملوث سعودی ولی عہد بن سلمان کے سمن جاری کردئے، یہ سمن جمال خاشقجی کی منگیتر اور وکلا کے گروپ کی جانب سے ڈسٹرکٹ آف کولمبیا کی وفاقی عدالت میں دائر درخواست پر جاری کئے گئے، درخواست میں الزام لگایا گیا ہے کہ بن سلمان اور دوسرے سعودی عہدیداروں نے ایک سازش اور تعصب کے ساتھ جمال خاشقجی کو ترکی میں سعودی قونصل خانے کے اندر اغوا اور تشدد کا نشانہ بنایا اور پھر قتل کردیا،وکیل نے کہا کہ مقدمہ کا مقصد نہ صرف بن سلمان اور دیگر سعودی عہدیداروں کو جمال کے قتل کے لئے جوابدہ ٹھہرانا ہے بلکہ سعودی حکومت اور دیگر حکومتوں کو بھی نوٹس پر رکھنا چاہتے ہیں کہ انہیں اس طرح کے قتل کی قیمت ادا کرنا پڑے گی۔