حکومتی سرپرستی میں فرقہ واریت کو فروغ دیا گیا، لیاقت بلوچ

تمام مسالک کے شرپسندوں اور غیر ذمہ دار اور دل آزاری پھیلانے والوں کا محاسبہ کریں
لاہور(نیوز ڈیسک) جماعت اسلامی کے مرکزی نائب امیراورملی یکجہتی کونسل پاکستان کے مرکزی جنرل سیکریٹری لیاقت بلوچ نے کہا ہے کہ عمران خان سرکار نے نعرہ ریاست مدینہ کا لگایا، لیکن عملی طور پر ملک میں قادیانیت، بدتہذیبی، سیکولرازم، کرپٹ مافیا، فرقہ واریت کی سرپرستی کو فروغ دیا ہے، پاکستان کے اسلامی و نظریاتی تشخص کو مسخ کیا جا رہا ہے،کراچی میں علما و مشائخ کے وفد اور میڈیا سے بات چیت میں کہا کہ لیاقت بلوچ نے کہا کہ تمام تر خدشات کے باوجود الحمد اللہ ماہ محرم بخیریت تکمیل ہوئے، اہلسنت و شیعہ علما و قائدین اور عوام نے حب دین اور حب الوطنی کا مظاہرہ کیا ہے، ان دنوں دل آزار تقاریر، کلام اور سوشل میڈیا پیجز نے تمام طبقات کو پریشان کیا ہے، یہ عناصر غیر ذمہ دار، عالمی استعماری ایجنڈا کے انجانے یا جان بوجھ کر آلہ کار بنے ہوئے ہیں،تمام مسالک کی قیادت ایسے شرپسندوں اور غیر ذمہ دار دل آزاری پھیلانے والوں کا محاسبہ کریں، اپنی صفوں سے نکال باہر کریں، انہیں خود عبرت بنا دیں اور حکومت ایسے لوگوں کے خلاف سخت ترین قانونی کاروائی کرے۔