مجلس وحدت مسلمین اور شیعہ علماء کونسل سوتری وٹ یونٹ کے زیراہتمام سانحہ مچھ کے شہداء کا چہلم امام بارگاہ زینبیہ سوتری وٹ میں منعقد ہوا، چہلم کی مجلس سے ایم ڈبلیو ایم جنوبی پنجاب کے صوبائی سیکریٹری جنرل علامہ سید اقتدار حسین نقوی، مولانا مظہر عباس صادقی، ذاکر اہلبیت (ع) رضوان حیدر قیامت، ضیغم عباس اور مولانا صابر بلوچ نے خطاب کیا۔ چہلم کی مجلس میں شیعہ علماء کونسل ملتان کے ضلعی صدر باقر عباس بلوچ، ایم ڈبلیو ایم جنوبی پنجاب کے صوبائی ڈپٹی سیکریٹری جنرل سلیم عباس صدیقی، سید ندیم عباس کاظمی، ضلعی سیکریٹری جنرل فخر نسیم صدیقی، مہر مزین عباس چاون، خلیفہ اقبال حسین، اظہر حسین، مداح حسین، الطاف حسین، فخرعباس اور دیگر نے بھی شرکت کی۔
دونوں جماعتوں کے مشترکہ پروگرام سے خطاب کرتے ہوئے علامہ اقتدار نقوی نے کہا کہ شہدائے کوئٹہ کے لواحقین کے ساتھ اظہار ہمدردی میں ملک بھر کی عوام سڑکوں پر نکل آئی، قوم نے ہمیشہ مظلوموں کی حمایت اور ظالموں سے نفرت کی ہے، دشمن ہماری شناخت مٹانے کے درپے ہے جبکہ ہم روز بروز مضبوط ہوتے جا رہے ہیں، کوئٹہ سمیت ملک بھر کے مومنین کی استقامت کو سلام پیش کرتے ہیں، جنہوں نے سخت سردی کے باوجود سرد راتیں سڑکوں پر گزاری۔ دیگر مقررین نے بھی شہدائے مچھ کو خراج تحسین پیش کیا۔
