لاہور واقعہ کیخلاف کہیں مکمل کہیں جزوی ہڑتال

 بیشتر شہروں میں کاروبار معمول کے مطابق رہا،ٹریفک چلتی رہی
کراچی، لاہور، اسلام آباد (نیوز ڈیسک) لاہور آپریشن کیخلاف مفتی منیب الرحمان سمیت علمائے کرام کی اپیل پر کراچی، لاہور، راولپنڈی، اسلام آباد، سمیت مختلف شہروں میں کہیں مکمل کہیں جزوی ہڑتال ہوئی، بعض شہروں میں تمام چھوٹے بڑے کاروباری مراکز اور مارکیٹیں بند رہیں جبکہ سڑکوں پر ٹریفک بھی معمول سے کم رہی اور دفاتر میں حاضری متاثر رہی تاہم مختلف شہروں میں کاروبار معمول کے مطابق رہا، دکانیں اور بازار کھلے تھے، سرکاری اور نجی ٹرانسپورٹ چلتی رہی ، بعض مقامات پر مظاہرین نے ٹائروں کو آگ لگا کر سڑک بند کرکے احتجاج کیا، پنجاب بھر میں پولیس ہنگامی صورتحال سے نمٹنے کے لیے ہائی الرٹ رہی اور سکیورٹی اہلکاروں کی بھاری نفری تعینات رہی۔ دوسری جانب حکومتی ترجمان نے دعویٰ کیا ہے کہ پہیہ جام ہڑتال کی کال مکمل طور پر ناکام ہوگئی، بڑے شہروں میں، چند ایک مقامات پر جزوی طور پر دکانیں بند ہیں۔