عصائب اہل الحق تحریک نے کہا کہ امریکی فوجیوں کی موجودگی عراق کیلئے ایک خطرہ شمار ہوتی ہے۔

امریکی حملہ ناقابل قبول، عراقی سالمیت پر کھلی جارحیت ہے (عالمی برادری)
امریکی حملہ جوابی اقدامات کو جنم دے گا،کوئی بھی غلط اقدام خطے کی سیکیورٹی کیلئے خطرناک ثابت ہوگا، روس،خطے میں نئی اشتعال انگیزی سے گریز کیا جائے،چین
یہ عراقی عوام کی خودمختاری اور آزادی پر حملہ ہے،شام، امریکا علاقے میں غاصبانہ موجودگی کا سلسلہ ختم کردے، ایران،خطے میں بدامنی کی اصل جڑامریکا ہے،پاسدارن انقلاب
تہران/ماسکو /بیجنگ (نیوز ڈیسک)عالمی برادری نے بھی عراق پر امریکی حملے کو جارحیت سے تعبیر کیا ہے، روسی وزارت خارجہ نے کہا کہ امریکی حملہ ناقابل قبول اور جوابی اقدامات کو جنم دے گا، امریکا اور کتائب حزب اللہ کے ایک دوسرے پر حملے ناقابل برداشت ہیں،دونوں فریق تحمل کا مظاہرہ کریں،کوئی بھی غلط اقدام خطے کی سیکیورٹی کیلئے خطرناک ثابت ہوگا، شام کی وزارت خارجہ نے عراقی عوام اور حکومت سے اظہاریکجہتی کرتے ہوئے کہاکہ امریکا نے عراق کی سالمیت پر حملہ کیا،یہ عراقی عوام کی خودمختاری،آزادی اور اقتدار اعلیٰ پر حملہ ہے،ایران کی وزارت خارجہ کے ترجمان نے عراق میں امریکی فوجیوں کی جارحیت اور عراق کی عوامی رضاکار فورس کے اڈوں پر امریکی حملوں کو دہشتگردی کا کھلا مصداق قرار دیا اور کہا کہ امریکا کو علاقے میں اپنی غاصبانہ موجودگی کا سلسلہ ختم کرنا چاہئے، سپاہِ پاسداران نے کہاکہ امریکی حملہ عراق کی خودمختاری کی کھلی خلاف ورزی ہے،اس حملے نے پھر ثابت کر دیا کہ خطے میں بدامنی، ہرج و مرج، افراتفری اور جنگی جنون کی اصلی جڑ خود امریکا ہے، حشد الشعبی کی داعش کیخلاف لازوال اور فیصلہ کن دلیری کو عراقی عوام نہ صرف کبھی بھول نہیں پائیں گے بلکہ عراقی عوام اپنی سرزمین پر موجود ناامنی اور غیر ملکی طاقتوں کیساتھ مقابلے میں اسی کو اپنے لئے نمونہ عمل بھی سمجھتے ہیں، چین نے بھی حملے کو افسوسناک قرار دیتے ہوئے خطے میں کسی نئی اشتعال انگیزی سے گریز پر زور دیا ہے۔