امریکا نے عراقی خودمختاری، عالمی قوانین کو روند ڈالا،رضا ربانی

امریکی اقدام کی مخالفت نہ کی گئی تو امریکا اس طرح کے مزید اقدامات کرے گا
اسلام آباد (نیوز ڈیسک)سینیٹر رضا ربانی نے کہا ہے کہ قاسم سلیمانی پر امریکی حملے کے بعد طاقت کے ایک نئے باب کا آغاز ہوچکا ہے، امریکی صدر ٹرمپ نے اہم ایرانی کمانڈر کے قتل کا خود حکم دیکر خطے میں نئی کشیدگی کا اہتمام کیا ہے جس سے علاقائی اور عالمی امن و سلامتی کے حوالے سے ان کی سنجیدگی کا بخوبی اندازہ لگایا جاسکتا ہے امریکا نے عراق کی خود مختاری اور عالمی قوانین کی خلاف ورزی کی اور پورے خطے کے جذبات کو ٹھیس پہنچائی ہے، یہ واضح طور پر ایک دہشت گردی کی کارروائی ہے، ایران کو چاہیئے کہ عالمی سطح پر امریکا کو قاسم سلیمانی کے قتل کا ذمہ دار قرار دلانے کیلئے قانونی اقدامات کرے، اگر امریکا کے اس اقدام کی مخالفت نہ کی گئی تو امریکا اس طرح کے مزید اقدامات کرسکتا ہے،انہوں نے کہاکہ قاسم سلیمانی کے قتل کے بعد ایران امریکا کے ساتھ مذاکرات کی ٹیبل پر نہیں بیٹھے گا۔