یکم دسمبرتک جامعہ حفصہ سے قبضہ ختم کرانے کی مہلت

پاکستان ماضی کی طرح مسئلہ حل کرنے کا متحمل نہیں ہو سکتا ، جسٹس محسن اختر
 اسلام آباد(نیوز ڈیسک) اسلام آباد ہائیکورٹ نے لال مسجد اور اطراف کی سڑکوں کی بندش کیخلاف کیس کی سماعت ملتوی کرتے ہوئے انتظامیہ کو یکم دسمبر تک قانون کے مطابق لال مسجد سے جامعہ حفصہ کی طالبات کا قبضہ ختم کرانے کی مہلت دی ہے، دوران سماعت جسٹس محسن اختر کیانی نے ریمارکس دئیے کہ عدالت نہیں چاہتی کہ ماضی میں لال مسجد کے مسئلے کو جیسے حل کیا گیا ، اب بھی ویسا ہی کچھ کیا جائے، ہمیں احساس ہے کہ ماضی میں جس طرح لال مسجد کا مسئلہ حل کیا گیا پاکستان اب اس کا متحمل نہیں ہو سکتا ، جسٹس محسن اختر کیانی نے پوچھا کہ مسجد کے اطراف سڑکیں کیوں بند ہیں۔ ڈپٹی کمشنر نے کہا کہ سیکیورٹی ایشوز کی وجہ سے ایک سڑک بند ہے۔ جسٹس محسن اختر کیانی نے کہا کہ لال مسجد میں طالبات کا کیا کام ہے؟ ڈپٹی کمشنر نے کہا کہ ہم پرامن طور پر مسئلے کے حل کے لئے جامعہ حفصہ کی انتظامیہ سے مذاکرات کر رہے ہیں