خیبر پختونخوا میں گورنر راج اور منتخب وزیراعلیٰ کی گرفتاری جمہوریت پر شب خون ہے، علامہ باقر زیدی

کراچی: مجلس وحدت مسلمین پاکستان کے مرکزی رہنما علامہ باقر عباس زیدی نے خیبر پختونخوا میں گورنر راج، منتخب وزیراعلیٰ کی گرفتاری اور منتخب حکومت کے خاتمے سے متعلق اقدامات کی شدید مذمت کرتے ہوئے کہا ہے کہ وفاقی حکومت اور اس میں شامل جماعتوں کا طرزِ عمل جمہوری اقدار اور آئینی اصولوں کے منافی ہے، عوامی مینڈیٹ کو طاقت کے ذریعے کچلنا جمہوریت پر براہِ راست حملہ ہے۔ اپنے بیان میں علامہ باقر زیدی نے کہا کہ خیبر پختونخوا کے عوام نے اپنے ووٹ سے حکومت منتخب کی ہے، کسی وفاقی حکومت یا حکمران اتحاد کو یہ حق حاصل نہیں کہ وہ عوام کے فیصلے کو اپنی سیاسی مصلحتوں کی بھینٹ چڑھائے، عوام کے ووٹ کی توہین کرکے اقتدار کو مستحکم کرنے کی کوشش جمہوری نظام کو کمزور کرنے کے مترادف ہے۔
انہوں نے کہا کہ وفاقی حکومت اور اس کے اتحادیوں کو سیاسی اختلافات کے حل کیلئے آئینی راستہ اختیار کرنا چاہیے، نہ کہ گرفتاریوں اور انتظامی اقدامات کے ذریعے مخالفین کو دبانے کی کوشش کرنی چاہیے، ایسی روش ملک میں سیاسی تصادم کو بڑھاوا دے گی اور قومی استحکام کیلئے نقصان دہ ثابت ہوگی۔