Ilyas 
قیام امن میں پاکستا ن کا کردار اہم رہا ہے، افغانستان میں موجودگی برقرار رکھنے کیلئے پاکستان نے امریکی افواج کو اجازت دے دی ہے، امریکی نائب وزیردفاع
اپوزیشن نے وضاحت مانگ لی، پاکستان میں امریکی فوجی اڈہ ہے اور نہ ہی ایسی کوئی تجویز زیر غور ہے ، ایسی قیاس آرائیاں غیر ذمہ دارانہ ہیں،پاکستانی دفتر خارجہ
واشنگٹن/اسلام آباد(نیوز ڈیسک) امریکا نے دعویٰ کیا ہے کہ پاکستان نے امریکی افواج کو افغانستان تک رسائی دینے کے لیے اپنی فضائی اور زمینی حدود استعمال کرنے کی اجازت دیدی ہے،جبکہ پاکستان نے اس کی تردیدکردی، تفصیلات کے مطابق امریکی نائب وزیردفاع برائے انڈو پیسفیک افیئرز ڈیوڈ ایف ہیلوے نے آرمڈ سروسز کمیٹی کو بریفنگ میں دعویٰ کیا کہ افغانستان میں موجودگی برقرار رکھنے کیلئے پاکستان نے امریکی افواج کو اپنی سرزمین کے استعمال کی اجازت دے دی ہے، انہوں نے کہا کہ افغانستان میں قیام امن اور فریقین کے درمیان مذاکرات کیلئے پاکستان کا کردار بہت اہم رہا ہے اس لئے امریکا خطے بالخصوص افغانستان میں امن اور ترقی کے لیے پاکستان کے ساتھ مذاکرات کا عمل جاری رکھے گا، ترجمان دفتر خارجہ نے پاکستان میں امریکی فوجی اڈوں سے متعلق غیر ذمہ دارانہ بیانات کو سختی سے مسترد کرتے ہوئے واضح کیا ہے کہ پاکستان میں کوئی امریکی فوجی یا ہوائی اڈہ نہیں اور نہ ہی ایسی کوئی تجویز زیر غور ہے ، اس طرح کی قیاس آرائیاں بے بنیاد اور غیر ذمہ دارانہ ہیں اور اس سے پرہیز کرنا چاہئے ،ا ±دھرپاکستان کی فضائی حدود امریکا کو دینے کی بازگشت قومی اسمبلی تک پہنچ گئی، اپوزیشن نے حکومت سے وضاحت کا مطالبہ کر دیا،لیگی رہنما احسن اقبال نے کہا کہ پاکستان نے امریکا کو اپنی فضائی حدود اور زمین استعمال کرنے کی اجازت دی ہے، کن شرائط پر یہ اجازت دی جارہی ہے‘ایسا ہی فیصلہ اس سے پہلے ایک جرنیل نے کیا تھا وہ تو ڈکٹیٹر شپ تھی کسی سے نہ تو پوچھا جاتا تھا اور نا بتایا جاتا تھا کیا موجودہ حکومت بھی یہی کر رہی ہے ؟ اگر نہیں تو بتائیں کی کن شرائط پر امریکا کو اپنی زمین اور آسمان استعمال کرنے کی اجازت دی جارہی ہے۔
