امریکا نے پاکستان سمیت 10 ممالک کو مذہبی آزادی کی خلاف ورزی کی فہرست میں شامل کرلیا

واشنگٹن: امریکی سیکریٹری خارجہ انٹونی بلنکن نے پاکستان اور افغانستان کو مذہبی آزادی کی خلاف ورزی سے متعلق خصوصی تشویش کے حامل ملک کی فہرست میں شامل کیا ہے۔ ٹرمپ انتظامیہ نے سب سےپہلے دسمبر 2018 میں پاکستان کواس فہرست میں شامل کیا اور 2020 میں بھی اسے برقرار رکھا۔ رواں سال جنوری میں برسراقتدار آنے والی جوبائیڈن انتظامیہ نے دو تبدیلیوں کے ساتھ پرانی فہرست کو برقرار رکھا۔ روس کو شامل کرتے ہوئے سوڈان کو سی پی سی فہرست سے نکال دیا۔ اس فہرست میں ان ممالک کورکھا جاتا ہےجہاں منظم (اور) جاری مذہبی آزادی کی سنگین خلاف ورزیاں ہورہی ہوں، امریکی سیکریٹری خارجہ انٹونی بلنکن نے کہا کہ میں برما، چین، اریٹیریا، ایران، ڈی پی آر کے، پاکستان، روس، سعودی عرب، تاجکستان اور ترکمانستان کو مذہبی آزادی کی سنگین خلاف ورزیوں سے متعلق سی پی سی کی فہرست میں شامل کررہا ہے۔ انہوں نے مزید کہا کہ الجزائر، کوموروس، کیوبا اور نکاراگوا کو ان حکومتوں کے لیے خصوصی واچ لسٹ میں بھی شامل کیا جا رہا ہے جو مذہبی آزادی کی سنگین خلاف ورزیوں میں ملوث رہی ہیں۔ سیکریٹری خارجہ انٹونی بلنکن نے الشباب، بوکو حرام، حیات تحریر الشام، حوثی، داعش، آئی ایس آئی ایس- گریٹر سہارا، داعش- مغربی افریقا، جماعت نصر الاسلام والمسلمین اور طالبان کو بھی خاص تشویش کی تنظیموں کے طور پر نامزد کیا۔