غزہ اور لبنان پر صیہونی حملے، 22 افراد شہید، متعدد زخمی

غزہ : غزہ اور لبنان رات بھر اسرائیلی جنگی طیاروں کا ہدف بنے رہے۔ بمباری اور میزائل حملوں میں بائیس افراد شہید اور کئی زخمی ہوگئے۔ صیہونی فوج نے نصیرات کیمپ۔ المغازی اور البریج پر بمباری کردی حملے میں دس فلسطینی شہید اور گیارہ زخمی ہوگئے۔ جنگی طیاروں نے کمال عدوان اسپتال پر بھی حملہ کیا جس میں ڈائریکٹر اور ڈاکٹروں سمیت عملے کے نو ارکان زخمی ہوگئے۔ ادھر شجاعیہ سے انخلا کرنے کے حکم سے افراتفری مچ گئی، رات گئے سینکڑوں فلسطینی نقل مکانی کرگئے۔
اسرائیلی بمباری سے ایک اور یرغمالی خاتون ماری گئی۔حماس کے عسکری ونگ القسام بریگیڈز کے ترجمان ابو عبیدہ نے خاتون کی ہلاکت کی تصدیق کرتے ہوئے کہاہے کہ خاتون کے ساتھ موجود ایک اور قیدی کی زندگی کو ابھی تک خطرہ لاحق ہے۔
لبنان کے دارالحکومت بیروت کے وسطیٰ علاقے میں بمباری سے طبی عملے کے مزید دو ارکان سمیت بارہ افراد شہید ہوگئے۔ چوبیس گھنٹوں میں نو رضاکار شہید ہوچکے ہیں۔ گذشتہ روز اسی علاقے پر حملے میں شہید ہونیوالوں کی تعداد بیس ہوگئی ہے۔