یحییٰ سنوار میدان جنگ میں جرأت مندی سے لڑتے ہوئے شہید ہوئے، حماس

غزہ : حماس نے اپنے سربراہ یحیٰ سنوار کے اسرائیلی حملے میں شہادت کی تصدیق کردی ہے۔ حماس کے سینئر رہنما خلیل الحیا نے اپنے بیان میں کہا ہے کہ آزادی اور خود مختاری کے لیے یحییٰ السنوار نے اپنی جان قربان کردی۔ وہ بہادری اور دلیری کے ساتھ اسرائیلی فوج کے سامنے آخری سانس تک ڈٹے رہے یہاں تک کہ اپنی جان اللہ کی راہ میں قربان کردی۔ انہوں نے کہاکہ یحییٰ السنوار نے لڑائی کے آخری لمحے تک ہتھیار نہیں ڈالے۔ اپنا سر اونچا رکھا اور تمام زندگی جدوجہد آزادیٔ فلسطین میں گزار دی۔ خلیل الحیا نے اس عزم کا اظہار کیا کہ مزاحمت کی تحریک مزید تقویت کے ساتھ یحییٰ السنوار کے مشن کو جاری رکھے گی اور مقصد حاصل کیے بغیر چین سے نہیں بیٹھیں گے۔ انہوں نے السنوار کے قتل کا انتقام لینے کا وعدہ کرتے ہوئے کہا کہ کا اسرائیلی یرغمالیوں کو اُس وقت تک رہا نہیں کریں گے جب تک اسرائیل غزہ پر حملے بند نہیں کر دیتا اور اپنی افواج کو واپس نہیں بلوالیتا۔