وائٹ ہاؤس کا گھیراؤ، ہزاروں مظاہرین کی ‘ریڈ لائن’ ریلی

واشنگٹن : واشنگٹن میں ہزاروں افراد نے غزہ جنگ کیخلاف وائٹ ہاؤس کا گھیراؤ کرلیا۔ غزہ جنگ کے خلاف ہزاروں مظاہرین نے وائٹ ہاؤس کے قریب ’ریڈ لائن‘ کے نام سے ریلی نکالی۔ ملک بھر کے شہروں سے آئے مظاہرین سرخ کپڑوں میں ملبوس تھے اور فلسطینی جھنڈے اور بینرز اٹھا رکھے تھے۔ مظاہرین نے غزہ جنگ میں صیہونی حکومت کی حمایت پر صدر جو بائیڈن کے خلاف نعرے لگائے۔ مظاہرین نے ہاتھوں میں بینرز اٹھا رکھے تھے جن پر اسرائیلی فوج کے ہاتھوں مارے جانے والے فلسطینیوں کے نام درج تھے۔ مظاہرین نے کہا کہ اسرائیل نے جوبائیڈن کی قرار دی گئی سرخ لائن کو عبور کیا ہے پھر بھی وہ خاموش ہیں۔ مظاہرے میں صدر جو بائیڈن پر زور دیا گیا کہ وہ غزہ کی جنگ کے حوالے سے اپنا نقطہ نظر تبدیل کریں۔