سید حسن نصر اللہ کے راستے کو جاری رکھیں گے، حزب اللّٰہ اب بھی مضبوط ہے، شیخ نعیم قاسم

بیروت : حزب اللّٰہ کے سربراہ شیخ نعیم قاسم نے کہا ہے کہ مزاحمت ختم نہیں ہوئی، حزب اللّٰہ اب بھی مضبوط ہے۔ حزب اللّٰہ کے سابق سربراہ سید حسن نصر اللّٰہ کی نماز جنازہ کے اجتماع سے خطاب میں شیخ نعیم قاسم نے حسن نصراللہ کو تاریخی، غیر معمولی، محب وطن عرب ، اسلامی رہنما قرار دیا اور کہا کہ ہم سید حسن نصراللہ کے راستے کو جاری رکھیں گے یہاں تک کہ ہم سب مارے جائیں۔ انہوں نے کہا کہ مزاحمت اب بھی اسرائیل کا سامنا کرنے کےلیے تیار ہے۔ غزہ کی حمایت کرنے کی جنگ فلسطین کو آزاد کرانے کے ہمارے عقیدے کا ایک حصہ ہے۔ انہوں نے کہا کہ ظالم امریکا کا لبنان پر قبضہ منظور نہیں، امریکا جو مقاصد جنگ سے حاصل نہیں کر سکا وہ سیاست سے بھی حاصل نہیں کرسکتا۔ نعیم قاسم نے کہا کہ حسن نصراللّٰہ کے راستے پر چلیں گے اور ان کی جدوجہد جاری رہے گی۔