امریکی صدر کا آج دوحہ میں مذاکرات کا دعویٰ، کوئی ملاقات طے نہیں، ایران

تہران : امریکی صدر ڈونلڈ ٹرمپ نے آج ایران سے دوحہ میں مذاکرات کا دعویٰ کیا ہے جبکہ ایران نے کہاہےکہ آئندہ چند روز میں امریکا سے کوئی ملاقات طے نہیں ہے۔ امریکی صدر ڈونلڈ ٹرمپ نے وائٹ ہاؤس میں صحافیوں سے گفتگو میں کہا تھا کہ ایران نے دوحہ میں ملاقات کا پیغام دیا ہے شاید یہ ملاقات اہم ہو۔ شاید نہ ہو۔ ہمیں معلوم ہو جائے گا۔ ایران جوہری ہتھیار نہ رکھنے پر راضی ہے۔
ادھر ایرانی وزارتِ خارجہ کے ترجمان اسماعیل بقائی نے واضح کیا ہے کہ آئندہ چند روز میں کسی بھی سطح پر ایران اور امریکہ کے درمیان کوئی ملاقات طے نہیں ہے۔ امریکی نمائندوں کے ممکنہ دورۂ قطر کا ایرانی وفد کے دورے سے کوئی تعلق نہیں۔ کیونکہ ایرانی تکنیکی وفد صرف مفاہمتی یادداشت پر عملدرآمد کا جائزہ لینے کے لیے دوحہ جا رہا ہے۔ حتمی معاہدے پر مذاکرات کا آغاز اس کی شقوں پر عملدرآمد کے تسلسل سے مشروط ہے۔