امریکا اور ایران معاہدے کے بہت قریب ہیں، امریکی نائب صدر

واشنگٹن : امریکی نائب صدر جے ڈی وینس کا کہنا ہے کہ امریکا اور ایران معاہدے کے بہت قریب ہیں تاہم ابھی معاہدہ نہیں ہوا۔ مزید پیش رفت کے بعد صدر معاہدے کی توثیق کی پوزیشن میں ہوں گے۔ واشنگٹن میں میڈیا سے گفتگو کرتے ہوئے امریکی نائب صدر جے ڈی وینس نے کہا کہ امریکا اور ایران کے مذاکرات کار معاہدے کی زبان اور یورینیم افزودگی کے معاملے سمیت چند اہم نکات پر مسلسل بات چیت کر رہے ہیں۔ ان کا کہنا تھا کہ ابھی یہ کہنا قبل از وقت ہو گا کہ معاہدہ کب ہوگا یا حتمی شکل اختیار کرے گا بھی یا نہیں۔ تاہم پیش رفت حوصلہ افزا ہے۔ جے ڈی وینس نے کہا کہ امریکا کو یقین ہے کہ ایرانی حکام نیک نیتی کے ساتھ مذاکرات کر رہے ہیں۔ امریکی نائب صدر کے مطابق واشنگٹن طویل عرصے سے یہ مطالبہ کرتا آ رہا ہے کہ ایران انتہائی افزودہ یورینیم کی پیداوار بند کرے اور اپنے موجودہ ذخائر کو بھی ختم کرے۔