عرب ارکان کو دہشت گرد قرار دینے پر اسرائیلی پارلیمنٹ میں ہنگامہ

تل ابیب : صیہونی وزیر کے عرب ارکان کو دہشت گرد قرار دینے پر اسرائیلی پارلیمنٹ مچھلی بازار بن گئی۔ اسرائیلی پارلیمنٹ کے اجلاس میں متعدد وزراء نے شرکت کی۔ اجلاس میں یرغمالیوں کی ڈیل کو زیر بحث لایا گیا عرب وزراء اس حوالے سے متفق نہ ہوئے۔ انہوں نے قومی سلامتی کے وزیر ایتمار بن غفیر پراس ڈیل کو ناکام بنانے کا الزام عائد کیا۔ جس پر بن غفیر پٹری سے اتر گئے اور دونوں عرب ارکان احمد الطیبی اور ایمن عودہ کو دہشت گرد قرار دے دیا اور کہا کہ باہر نکل جاؤ۔َ بن غفیر کی اشتعال انگیزی پر دونوں عرب ارکان غصے میں آگئے اور اسی حالت میں بن غفیر کی ڈائس کے قریب پہنچ گئے۔ لیکوڈ پارٹی کے ارکان نے دونوں کا راستہ روک لیا۔ اسرائیلی وزیر نے چیخ کر کہا کہ تمام دہشت گردوں کو نکال دو ، یہ سب دہشت گرد ہیں۔ اس موقع پر پارلیمنٹ کے ڈپٹی اسپیکر نے بن غفیر کے جملوں کو قابل اعتراض قرار دیا۔ تاہم بن غفیر اپنے موقف پر قائم رہے۔