Raza Musani 
تہران : اقوام متحدہ نے امریکی اشارے پر ایران سمیت 8 ممالک کو رکنیت فیس ادا نہ کرنے کے باعث حق رائے دہی سے محروم کر دیا ایرانی وزارت خارجہ کے ترجمان سعید خطیب زادہ نے اقدام کو افسوس ناک قرار دیتے ہوئے کہا ہے کہ امریکا کی یکطرفہ اور ظالمانہ پابندیوں کے سبب ایران دوسال سے اقوام متحدہ میں رکنیت کی فیس ادا نہیں کر پا رہا ہے۔ ایران اقوام متحدہ کے بنیادی اور سرگرم اراکین میں شمار ہوتا ہے اور وہ خود کو اقوام متحدہ اور دیگر بین الاقوامی اداروں میں رکنیت کی فیس بروقت ادا کرنے کا پابند سمجھتا ہے اور پابندیوں کے باعث تمام تر محدودیتوں اور رکاوٹوں کے باوجود ایران نے رکنیت کی فیس کی ادائیگی کا بندوبست کر لیا ہے اور معاملے کے حل کے لئے اس وقت بات چیت ہو رہی ہے۔ایران کی کوشش ہے کہ ایک ایسا چینل کا بندوبست کر دیا جائے جس سے اقوام متحدہ کی رکنیت فیس کو جلد از جلد اور بر وقت ادا کیا جائے بہتر یہ ہے کہ اقوام متحدہ کے سیکریٹری جنرل اور اسکا سیکریٹیریٹ غیر قانونی پابندیوں کے شکار ممالک کی خاص صورتحال کو مد نظر رکھیں اور فیس کی ادائیگی کی راہ میں پیش آنے والی رکاوٹوں کو نظر انداز نہ کریں۔
