دنیا خاموش تماشائی، نصیرات میں ایک اور اسکول تباہ، 17 فلسطینی شہید، جبالیہ میں 800 شہادتیں

غزہ : عالمی دنیا خصوصاً عرب ممالک کی خاموشی و بے حسی کے باعث اسرائیل کی درندگی میں روز بروز اضافہ جاری ہے۔ صیہونی فوج نے ایک اور اسکول کو نشانہ بنادیا۔ حملے میں سترہ فلسطینی شہید اور بتیس زخمی ہوگئے۔ نصیرات میں اسکول پر حملے میں بڑے پیمانے پر تباہی پھیلی اور درجنوں افراد ملبے تلے دب گئے۔ اسکول میں بڑی تعداد میں بے گھر مقیم تھے۔ شہدا میں گیارہ ماہ کا بچہ بھی شامل ہے۔ اس سے قبل اسرائیلی فوج نے جنوبی غزہ اور وسطی غزہ میں بھی تین عمارتوں کو میزائلوں سے تباہ کردیا۔ جس میں مزید ستائیس فلسیطنی شہید ہوگئے۔
ادھر شمالی غزہ میں جبالیہ کیمپ پر صیہونی فوج کے بیس روز سے جاری محاصرے میں آٹھ سو سے زائد فلسطینی شہید ہوچکے ہیں اور پانچ ہزار سے زائد ملبے تلے لاپتہ ہیں۔ عرب میڈیا کے مطابق اسرائیلی فوج گھروں میں داخل ہوکر فلسطینیوں کو علاقے سے بے دخل کررہی ہے۔ کئی مقامات پر انتہائی دائیں بازو کے شدت پسند اسرائیلی فوجیوں نے فلسطینی بچوں اور بزرگوں کو بھی قتل کیا ہے۔ فلسطینی وزارت صحت کے مطابق علاقے سے اسی ہزار فلسطینی نقل مکانی کرگئے ہیں اور اسرائیلی فوج علاقے میں رہائشی عمارتوں کو تباہ کررہی ہے۔