Raza Musani 
تہران: پاسداران انقلاب کا کہنا ہے کہ ایران کو بغیر کسی قیمت کے دھمکیاں دینے کا دور ختم ہو چکا ہے اور خبردار کیا ہے کہ کسی بھی جارحیت کا جواب دردناک اور پشیمانی پر مجبور کر دینے والا دیا جائے گا۔
آپریشن ٹرو پرامس(وعدہ صادق) ٹو کی دوسری سالگرہ کے موقع پر جاری بیان میں آئی آر جی سی نے کہا کہ یہ آپریشن آئی آر جی سی کی ایرو اسپیس فورس کی جانب سے کیا جانے والا ایک تاریخی اور ناقابل فراموش کارنامہ اور باعثِ فخر حملہ تھا۔ آئی آر جی سی کے مطابق آپریشن کے دوران مزاحمتی کمانڈروں اور رہنماؤں، بشمول اسماعیل ہنیہ، سید حسن نصراللہ اور بریگیڈیئر جنرل عباس نیلفروشان کے قتل کا جواب دینے کے لیے ایران کے عزم کا اظہار کیا گیا، اور مقبوضہ علاقوں کے قلب کو درست نشانہ بنانے والے میزائلوں اور ڈرونز کی متعدد لہروں سے نشانہ بنایا گیا۔
بیان میں کہا گیا کہ آپریشن ٹرو پرامس ٹو نے اسرائیلی حکومت کی کھوکھلی طاقت کے شرمناک انہدام کو دنیا کے سامنے بے نقاب کر دیا۔ آئی آر جی سی کے مطابق یہ آپریشن عالمی اداروں کی جانب سے دشمن کے جرائم اور جارحانہ اقدامات پر اختیار کی گئی جان لیوا خاموشی کے دوران محض دشمن کو سخت سزا دینے تک محدود نہیں تھا۔ آئی آر جی سی نے زور دیا کہ آپریشن نے دشمنوں کو واضح پیغام بھی دیا کہ بغیر کسی قیمت کے دھمکیاں دینے کا دور ختم ہو چکا ہے اور ہر جارحیت کے بعد دردناک اور پشیمانی پر مجبور کر دینے والا جواب دیا جائے گا۔ بیان میں مزید کہا گیا کہ اس آپریشن نے ایران کی میزائل طاقت کا مظاہرہ کیا اور اسرائیلی حکومت اور اس کے حامیوں، بالخصوص ’’وائٹ ہاؤس کے مجرم حکمرانوں‘‘ کو حیران کن صلاحیتوں کا سامنا کرنا پڑا۔ بیان میں مزید کہا گیا کہ آئی آر جی سی اب دوستوں اور دشمنوں دونوں کی نظر میں اسلامی جمہوریہ ایران کی طاقت کا ایک ستون بن چکی ہے۔
