امریکا پر عدم اعتماد کے سبب مذاکرات کا کوئی فائدہ نہیں، ایرانی صدر

تہران: صدر مسعود پزشکیان نے کہا ہے کہ امریکا پر بے اعتمادی کے سبب اس سے مذاکرات کا کوئی فائدہ نہیں، امریکا کا ہدف ایران حکومت کا تختہ الٹنا ہے۔ ایرانی میڈیا کے مطابق آرمینیا کے وزیر خارجہ ارارات مرزویان نے ایران کے صدر مسعود پزشکیان سے تہران میں ملاقات کی۔ اس موقع پر ایرانی صدر کا کہنا تھا کہ جب بھی ایران مذاکرات کی میز پر آیا اسے فوری طور پر جنگ کا سامنا کرنا پڑا۔ ان کا کہنا تھا کہ مذاکرات کے بعد تین بار ایران پر حملے کیے جا چکے ہیں جو اس بات کا اظہار ہے کہ امریکا کو ڈائیلاگ میں دلچسپی نہیں۔ صدر پزشکیان نے کہا کہ ایسا دشمن جو ہر روز قتل، پابندیوں، دباؤ، دھمکانے اور وعدے توڑنے والا ہو اس سے مذاکرات بے معنی ہیں۔