Raza Musani 
غزہ :غزہ میں صیہونی فوج نے انسانیت سوزی کے نئے ریکارڈ بنادئے۔ صبح سے جاری حملوں میں اکتالیس فلسطینی شہید اور کئی زخمی ہوگئے۔ صیہونی فوج نے شمالی اور وسطی غزہ میں وحشیانہ حملے کئے جس میں گیارہ فلسطینی شہید اور کئی زخمی ہو گئے۔ نصیرات پناہ گزین کیمپ میں ایک گھر کو نشانہ بنایا گیا جس کے نتیجے میں ابو دلال خاندان کے سات افراد شہید ہوئے۔ جبالیہ پناہ گزین کیمپ میں اسرائیلی فوج کی کارروائی میں چار افراد مارے گئے۔صیہونی فوج کے حملوں میں زخمی متعدد افراد کی حالت تشویشناک ہے۔ غزہ کی وزارت صحت کے مطابق شمالی غزہ پر اسرائیلی فوج کے آٹھ روزہ محاصرے کے دوران دو سو سے زائد فلسطینی شہید ہو چکے ہیں۔ کئی لاشیں ملبے تلے دبی ہیں جنہیں نکالنے والا کوئی نہیں ہے۔
صیہونی فوج ریسکیو ٹیموں کو علاقے میں رسائی نہیں دے رہی ہے۔ صیہونی فوج نے جبالیہ میں ہر قسم کی آمدورفت بند کرکے بڑے پیمانے پر تباہی مچائی ہے۔ ہفتے کے روز غزہ میں اسرائیلی حملوں میں چھتیس فلسطینی شہید ہوئے تھے۔
