شہداء کے خون کا بدلہ ضرور لیا جائے گا، شہید کے راستے کو جاری رکھیں گے، ولی امر مسلمین

شہداء کے خون کا بدلہ ضرور لیا جائے گا، شہید کے راستے کو جاری رکھیں گے، ولی امر مسلمین
تہران: ولی امر مسلمین آیت اللہ سید مجتبیٰ خامنہ ای نے شہید رہبر آیت اللّٰہ العظمیٰ سید علی خامنہ ای کے قتل کا بدلہ لینے کا اعلان کر دیا۔ اپنے تحریری بیان میں آیت اللہ سید مجتبیٰ خامنہ ای نے کہا کہ سپریم لیڈر کے قتل کا بدلہ قوم کا مطالبہ ہے اور یہ ضرور لیا جائے گا، ان مجرموں سے شہید رہنماء سمیت تمام شہداء کا بدلہ لینے کا عہد کرتے ہیں اور ذمہ داروں کو کسی صورت معاف نہیں کیا جائے گا۔ اپنے والد کی تدفین اور آخری رسومات کے اختتام پر جاری کیے گئے پیغام میں ولی امر مسلمین سید مجتبیٰ خامنہ ای نے ایران اور عراق میں کروڑوں افراد کی جانب سے شہید آیت اللّٰہ خامنہ ای کے جنازے میں شرکت پر اظہار تشکر کیا۔
انہوں نے کہا کہ تہران، قم، نجف، کربلا، مشہد سمیت دونوں ممالک کے شہروں اور دیہات میں عوام کی بھرپور شرکت قومی اتحاد، استقامت اور انقلابِ اسلامی سے وابستگی کا واضح اظہار ہے۔ آیت اللہ سید مجتبیٰ خامنہ ای نے عہد کیا کہ وہ ان کے مشن اور راستے کو پوری ثابت قدمی سے جاری رکھیں گے اور ایران مشکلات کے باوجود اپنے اہداف سے پیچھے نہیں ہٹے گا۔ انہوں نے مزید کہا کہ قاتلوں کی شناخت ہوچکی ہے اور انہیں یہ امید نہیں رکھنی چاہیئے کہ وہ انصاف سے بچ سکیں گے۔ ان کے بقول، انتقام کا عمل کسی ایک فرد یا عہدے سے وابستہ نہیں بلکہ ہر حال میں جاری رہے گا۔