جاسوس غبارہ، امریکا اور چین کے درمیان نیا تنازع، ایک دوسرے پر الزامات

بیجنگ : امریکا اور چین کے درمیان جاسوس غباروں کے معاملے پر نیا تنازع کھڑا ہوگیاہے۔ چین کی وزارت خارجہ کے ترجمان نے الزام عائد کیا ہے کہ امریکا نے فضائی حدود کی خلاف ورزی کرتے ہوئے گزشہ ایک برس کے دوران 10 سے زائد غبارے بھیجے اور چین کی قومی سلامتی کو خطرے میں ڈالا۔ اس دراندازی کے باوجود چین کا ردعمل ذمہ دارانہ اور پیشہ ورانہ تھا۔ ترجمان نے غباروں سے متعلق مزید وضاحت نہیں دی کہ غبارےکس نوعیت کے تھے اور کن مقاصد کے لیے بھیجے گئے تھے اور کیا چین نے سفارتی سطح پر اس پر آواز اُٹھائی تھی۔ ادھر امریکا نے فضاؤں میں پرواز کرنے والی مزید دو مشکوک شے کو بھی نشانہ بنایا ہے۔ ابھی یہ واضح نہیں کہ کینیڈا کی فضاؤں میں پرواز کرنے والی یہ مشکوک شے کیا تھی تاہم امریکا و کینیڈا نے اس مشکوک شے کا الزام بھی چین پر عائد کیا ہے ۔