Raza Musani 
جوہانسبرگ: جنوبی افریقہ نے اسرائیلی فوج کے لیے لڑنے والے اپنے شہریوں کو گرفتار کرنے کا اعلان کردیا ہے۔ افریقی نیشنل کانگریس کی ایک میٹنگ سے خطاب میں جنوبی افریقہ کی وزیر برائے بین الاقوامی تعلقات اور تعاون نالیدی پینڈور نے کہا ہے کہ اسرائیلی فوج میں شامل شہریوں کو واپسی پر مقدموں کا سامنا کرنا پڑے گا۔ غزہ میں نسل کشی میں ملوث کسی شہری کے ساتھ رعایت نہیں برتی جائے گی۔ انہوں نے کہا کہ جو لوگ اسرائیلی ڈیفینس فورس کے ساتھ جنگ میں شریک ہیں انہیں متنبہ کرنے کے لئے میں پہلے ہی بیان جاری کرچکی ہوں۔ ہم تیار ہیں۔ جب تم لوٹو گے ہم تمہیں گرفتارکریں گے۔ دلیر سیاست داں نے اپنی تقریر میں فلسطینیوں کے ساتھ اظہار یکجہتی کرتے ہوئے ایک مرتبہ پھر دسمبر میں دیا گیا اپنا بیان دوہرایا جس میں انہوں نے اسرائیلی فوج میں شامل جنوبی افریقی شہریوں کو متنبہ کیا تھا کہ واپسی پر انہیں انصاف کا سامنا کرنا پڑے گا۔
