دہلی میں گائے، بچھڑے، اونٹ اور دیگر ممنوعہ جانوروں کی قربانی پر پابندی عائد

دہلی: انڈیا میں دہلی حکومت نے عیدالاضحیٰ کے موقع پر نئی ہدایات جاری کرتے ہوئے گائے، بچھڑے، اونٹ اور دیگر ممنوعہ جانوروں کی قربانی پر پابندی عائد کر دی ہے۔ دہلی حکومت کے وزیر کپل مشرا نے سوشل میڈیا پلیٹ فارم ایکس پر بیان دیتے ہوئے کہا ہےکہ ممنوعہ جانوروں کی قربانی میں ملوث افراد کے خلاف فوجداری کارروائی کی جائے گی۔ اور مقدمات درج کیے جائیں گے۔ ترقیاتی محکمے کی جانب سے جاری ضابطوں کے مطابق سڑکوں، گلیوں اور عوامی مقامات پر قربانی کی اجازت نہیں ہوگی اور قربانی صرف مقررہ اور مجاز مقامات پر ہی کی جا سکے گی۔ ہدایت نامے کے مطابق قربانی کا فضلہ نالوں، سیوریج لائنوں یا عوامی مقامات پر پھینکنے پر بھی پابندی عائد کر دی گئی ہے۔ حکومت نے جانوروں کی غیر قانونی خرید و فروخت، نقل و حمل اور غیر قانونی ذبح کے خلاف خصوصی نگرانی اور سخت کارروائی کا حکم دیا ہے۔