بغداد میں امریکی سفارت خانے پر راکٹ حملہ

بغداد : عراقی دارالحکومت بغداد کے انتہائی سیکیورٹی والے علاقے گرین زون میں امریکی سفارت خانے پر 4راکٹ داغے گئے۔علاقے میں سفارتی مشن اور عراق کی حکومت اور پارلیمان کے دفاتر واقع ہیں۔ عراقی حکام نے بتایا کہ تین میزائل امریکی سفارت خانے کے احاطے میں گرے ہیں اور ایک راکٹ قریبی اقامتی کمپلیکس میں اسکول پر گرا ۔ راکٹ حملے میں ایک لڑکی اور ایک خاتون زخمی ہوئی ہے۔ بیان میں کہا گیا ہے کہ راکٹ بغداد کے محلے الدورہ سے داغے گئے تھے۔ عینی شاہدین نے بتایا کہ انھوں نے حملے کے دوران سفارت خانے کے سی ریم دفاعی نظام کی آواز سنی تھی۔اس نظام کے ذریعے آنے والے راکٹوں، توپ خانے اور مارٹر گولے کا پتا لگایا جاتا اورانھیں تباہ کیا جاسکتا ہے۔ یہ نیا حملہ عراق میں امریکا اوراس کی تنصیبات پر راکٹ اور ڈرون حملوں کے سلسلے ہی کی کڑی ہے۔نئے سال کے آغاز سے عراق میں امریکی فوجیوں اور ان کی تنصیبات کو متعدد راکٹ اور ڈرون حملوں میں نشانہ بنایا جاچکاہے۔