Raza Musani 
ڈھاکا: بنگلہ دیش میں کوٹہ سسٹم کے خلاف احتجاج میں شدت آگئی۔ طلبا نے سرکاری نشریاتی ادارے کی عمارت کو آگ لگادی۔ بنگلہ دیش میں سرکاری ملازمتوں میں کوٹہ سسٹم کیخلاف ایک ہفتے سے احتجاج جاری ہے۔ گذشتہ روز دارالحکومت ڈھاکا میں ہزاروں طلبا نے وزیراعظم حسینہ واجد کے خلاف مظاہرہ کیا۔ پولیس نے مظاہرین کو منتشر کرنے کیلئے شیلنگ کی۔ مشتعل طلبا سرکاری ٹیلیویژن نیٹ ورک کے آفس میں گھس گئے اور اسے آگ لگادی۔ فائر بریگیڈ کے عملے نے ٹیلیویژن اسٹیشن سے تمام افراد کو بحفاظت نکال لیا۔ ہنگاموں کی وجہ سے ملک میں اسکولوں، کالجوں اور یونیورسٹیوں کو غیر معینہ مدت کے لیے بند کردیا گیا ہے۔ اب تک فورسز اور مظاہرین کی جھڑپوں میں بتیس افراد ہلاک ہوچکے ہیں۔ جبکہ ڈھائی ہزار سے زائد افراد زخمی ہوئے ہیں۔ طلبا نے مطالبہ کیا ہے کہ سول سروس میں جنگ آزادی میں شریک بچوں کا کوٹہ ختم کیا جائے۔ مظاہرین نے وزیراعظم حسینہ واجد کو ڈکٹیٹر قرار دیتے ہوئے ان سے مستعفی ہونے کا بھی مطالبہ کیا ہے.
