غزہ اور لبنان پر حملوں کیخلاف یورپ میں مظاہرے اور ریلیاں

اسٹاک ہوم: غزہ اور لبنان پر اسرائیل کے حملوں کے خلاف یورپ بھر میں احتجاجی مظاہرے کئے گئے اور ریلیاں نکالی گئیں۔ سوئیڈن میں موسم انتہائی سرد ہونے کےباوجود سول سوسائٹی کی مختلف تنظیموں کی کال پر ایک ہزار کے قریب لوگ دارالحکومت اسٹاک ہوم کے علاقے اوڈن پلان میں جمع ہوئے۔ مظاہرین نے اسرائیل سے حملے بند کرنے اور فوری جنگ بندی کا مطالبہ کیا۔ مظاہرین نے بینرز اٹھا رکھے تھے جن پر لکھا تھاکہ غزہ میں بچے مارے جا رہے ہیں۔نسل کشی بند کرو۔
نیدر لینڈ کے مختلف شہروں میں فلسطینی حامیوں نے احتجاج کیا۔ دارالحکومت ایمسٹرڈیم کے ڈیم اسکوائر پر سینکڑوں افراد جمع ہوئے۔ مظاہرین سے خطاب کرتے ہوئے مقررین نے مغربی حکومتوں بشمول نیدرلینڈز، امریکا، برطانیہ اور جرمنی کو اسرائیل کی حمایت جاری رکھنے پر تنقید کا نشانہ بنایا۔
جنیوا میں پلیس ڈی نیو اسکوائر پر بھی احتجاجی مظاہرہ کیا گیا۔ مظاہرین شہر کے مرکز تک مارچ کرنے سے پہلے چوک پر جمع ہوئے۔ فلسطینی اور لبنانی پرچم لہراتے ہوئے فرانسیسی، انگریزی اور عربی میں اسرائیل کی مذمت میں نعرے لگائے۔