Raza Musani 
ریاض : سعودی عرب سمیت چودہ ممالک نے مشرق وسطی کی اہم آبی گزر گاہوں میں جہاز رانی کے تحفظ کیلئے بحری دفاعی اتحاد قائم کرلیا۔ ریاض میں فوجی شخصیات کے اجلاس کے بعد جاری اعلامیہ میں کہا گیا کہ کثیر القومی میری ٹائم ڈیفنس الائنس کا مقصد گلوبل میری ٹائم سکیورٹی کو درپیش بڑھتے ہوئے چیلنجوں سے نمنٹا ہے۔
سعودی عرب اس اتحاد کا بانی اور سربراہ ملک ہو گا، جبکہ اتحاد کا مستقل صدر دفتر بھی مملکت میں قائم کیا جائے گا۔ یہ اتحاد بحری سلامتی کے فروغ سمیت جہاز رانی اور بین الاقوامی تجارت و توانائی کی ترسیل کے راستوں کے تحفظ، باب المندب ، ریڈ سی اور خلیج عدن میں مشترکہ بحری مفادات کے دفاع کے لیے کام کرے گا۔
سعودی وزارتِ دفاع کے مطابق پاکستان، ترکیہ، مصر، سوڈان سمیت 14 ممالک نے سعودی عرب کی قیادت میں مجوزہ کثیرالملکی بحری دفاعی اتحاد کی حمایت میں مشترکہ اعلامیہ جاری کیا ہے۔
مشترکہ اعلامیے پر سعودی عرب، کویت، بحرین، قطر، اردن، یمن، بنگلا دیش، نائیجیریا اور صومالیہ نے بھی دستخط کیے، جبکہ اس میں اتحاد کے قیام سے متعلق پیش رفت کا خیرمقدم کیا گیا۔
اعلامیے میں کہا گیا کہ بعض دیگر ممالک نے بھی اتحاد کی حمایت کا اظہار کیا ہے، تاہم وہ باضابطہ شمولیت کے لیے اپنے داخلی قانونی مراحل مکمل کر رہے ہیں، جبکہ مزید ممالک کے لیے اتحاد کے دروازے کھلے رہیں گے۔
