Raza Musani 
تہران (نیٹ نیوز) ایران کے صدر حسن روحانی سے تہران میں تعینات پاکستانی سفیر رحیم حیات قریشی نے ملاقات کی اور صدر روحانی کو اپنی تقرری کی اسناد پیش کیں۔ اس موقع پر ڈاکٹر حسن روحانی نے ایران اور پاکستان کے درمیان مشترکہ سرحدوں کو کھولنے اور تجارتی لین دین بڑھانے کی ضرورت پر زور دیتے ہوئے دونوں ملکوں کے درمیان طے پانے والے معاہدوں کے نفاذ پر زور دیا۔
حسن روحانی نے کورونا وائرس کے پھیلاؤ کی وجہ سے مشترکہ سرحدوں کی بندش کی جانب اشارہ کرتے ہوئے اس امید کا اظہار کیا کہ کورونا وائرس کے پھیلاؤ میں کمی اور صحت کے رہنما اصولوں پر عمل پیرا ہونے اور سرحدوں کے کچھ حصے کو از سر نو کھولنے سے صورتحال جلد معمول پر آجائے گی جس سے سرحدی بازاروں کی سرگرمیوں اور باہمی تجارتی لین دین کو مزید فروغ حاصل ہوگا۔
ایران کے صدر نے دونوں ملکوں کے درمیان تعلقات کے فروغ پر زور دیتے ہوئے اس امید کا اظہار کیا کہ مشترکہ سرحدوں کی سیکیورٹی کی فراہمی میں باہمی تعاون میں مزید اضافہ ہوجائے گا۔
صدر روحانی نے اپنے پاکستانی ہم منصب اور پاکستانی وزیر اعظم سے ہونے والی ملاقاتوں اور ٹیلی فونک رابطوں کا ذکر کرتے ہوئے دونوں ملکوں کے درمیان طے پانے والے معاہدوں کے نفاذ پر تاکید کرتے ہوئے کہا کہ ان معاہدوں کے نفاذ سے تہران اور اسلام آباد کے درمیان اقتصادی تعلقات مزید مستحکم ہوں گے۔
