عمرہ اور تراویح پر پابندی، حج کا فیصلہ ماہ رمضان میں ہوگا

15رمضان تک کرلیا جائے گا،سعودی وزارت اسلامی امور نے اعلان کیا ہے کہ رمضان المبارک کے دوران نماز تراویح صرف گھر میں ادا کی جائے گی کیونکہ کورونا وائرس کے خاتمے تک عوامی اجتماعات اور مساجد میں نماز کے اجتماعات پر پابندی ہوگی،اعتکاف اور افطار پر بھی پابندی ہوگی، انہوں نے کہا کہ مساجد میں روزانہ پانچوں نمازوں کی ادائیگی کی معطلی نماز تراویح کی معطلی سے زیادہ اہم ہے، ہم اللہ رب العزت سے دعا کرتے ہیں کہ وہ مساجد یا گھروں میں نماز تراویح قبول کرے، ادھر سعودی حکومت نے رمضان المبارک کے لیے عمرہ ویزہ جاری نہ کرنے کا بھی فیصلہ کیا ہے، سعودی عرب میں 24 اپریل سے رمضان المبارک کا آغاز ہورہا ہے، دوسری جانب پاکستان کے وزیر مذہبی امور نورالحق قادری کا کہنا ہے کہ 15 رمضان المبارک تک رواں سال حج ہونے یا نہ ہونے کا فیصلہ ہوجائے گا، انہوں نے کہا کہ سعودی حکومت کے پاس حج ادائیگی سے متعلق مختلف آپشنز زیر غور ہیں،صرف سعودی عرب میں رہنے والے حج کی سعادت حاصل کرسکیں، صرف خلیجی ممالک کے حجاج حج کی سعادت حاصل کرسکیں یا تمام ممالک کے کوٹے کو صرف 10 فیصد تک کردیا جائے، وزیر مذہبی امور کا کہنا تھا کہ سعودی حکومت حج سے متعلق پاکستان سے مشاورت کرکے حتمی فیصلہ کرے گی، تاریخ میں 40 مرتبہ سے زائد حج مکمل یا جزوی طور پر نہیں ہوا۔