نائیجریا: آیت اللہ ابراہیم زکزاکی کی یمنی عوام کے حق میں آواز اٹھانے کی اپیل

ابوجا: نائیجیریا کی تحریک اسلامی کے سربراہ آیت اللہ ابراہیم زکزاکی نے عالمی برادری سے یمنی عوام کی حمایت اور سعودی اتحاد کے بہیمانہ جرائم کے خلاف آواز اٹھانے کی اپیل کی ہے۔ انہوں نے کہا کہ یمن کے خلاف جاری سعودی عرب کی بہیمانہ جارحیت اور فضائی حملوں پر عالمی خاموشی کا کوئی جواز پیدا نہیں ہوتا۔ انہوں نے یمن پر سعودی عرب کی سات سالہ جارحیت کے نتائج کے سلسلے میں ایک آن لائن نشست سے خطاب کرتے ہوئے یمن پر سعودی عرب کے مسلسل حملوں کو انسانیت کے خلاف جنگی جرم قرار دیا۔ انہوں نے کہا کہ جارح سعودی اتحاد کو لگام دینے کا واحد راستہ اُس کے خلاف مزاحمت و استقامت ہے۔ انہوں نے امید ظاہر کی کہ وہ دن جلد ہی آئے گا جب یمنی عوام کامیابی و کامرانی جبکہ جارح سعودی عرب اور اسکے اتحادی شکست و ناکامی سے ہمکنار ہوں گے۔