جنگ بندی معاہدہ پر قاہرہ میں حماس کے ثالثوں سے مذاکرات

قاہرہ : حماس نے جنگ بندی معاہدے کے دوسرے مرحلے کے انتظامات پر قاہرہ میں ثالثوں اور فلسطینی دھڑوں کے ساتھ ملاقاتوں کا آغاز کر دیا ہے۔ حماس ترجمان حازم قاسم کے مطابق قاہرہ میں ہونے والے مذاکرات کا بنیادی مقصد جنگ بندی معاہدے کے پہلے مرحلے پر مکمل عمل درآمد کو یقینی بنانا ہے۔ حازم قاسم نے کہا کہ مذاکرات میں اسرائیلی خلاف ورزیوں کے خاتمے، سرحدی گزرگاہوں کو دوبارہ کھولنے اور غزہ میں انسانی امداد کی بلا رکاوٹ فراہمی کے معاملات زیرِ بحث آئیں گے۔ انہوں نے بتایا کہ دوسرے مرحلے سے متعلق امور، جن میں غزہ میں بین الاقوامی فورسز کی تعیناتی اور فلسطینی مزاحمتی گروہوں کو غیر مسلح کرنے سے متعلق تجاویز شامل ہیں، پر بھی گفتگو ہوگی۔ ان کا کہنا تھا کہ حماس قومی ذمہ داری کے تحت مذاکرات میں شریک ہے اور فلسطینی عوام کے مفادات کو اپنی سیاسی کوششوں کا محور بنائے ہوئے ہے۔