Raza Musani 
نئی دہلی: ہندوستان کے نامزد وزیراعظم نریندر مودی کی تقریب حلف برداری آج شام ہوگی۔ نریندر مودی جواہر لال نہرو کے بعد تیسری بار وزارتِ عظمیٰ کے منصب پر فائز ہونے والے دوسرے بھارتی سیاستدان ہوں گے۔ حلف بردای کی تقریب ہندوستانی وقت کے مطابق شام سوا سات بجے راشٹریہ بھون میں ہوگی۔ وزیراعظم کے ساتھ تیس رکنی کابینہ بھی حلف اٹھائے گی۔ زیادہ تر وزرا کو پرانے قلمدان ہی ملنے کا امکان ہے۔ سری لنکا اور مالدیپ کے صدور جبکہ بنگلادیش، ماریشیس، نیپال اور بھوٹان کے وزرائے اعظم نے تقریب میں شامل ہونے کی تصدیق کردی ہے۔ دیگر کئی اہم غیرملکی شخصیات کے بھی آنے کا امکان ہے۔ جس کی وجہ سے نئی دلی میں سیکیورٹی ہائی الرٹ کردی گئی ہے۔ پولیس نے دارالحکومت نئی دہلی کو اگلے 2 دن کے لیے نو فلائی زون بھی قرار دے دیا ہے جبکہ نئی دہلی میں داخل ہونے والے کچھ راستوں کو بند کردیا جائے گا، تقریبِ حلف برداری کے لیے کمانڈوز بھی تعینات ہوں گے۔
