نائیجیریا: پولیس پھر شیعہ مظاہرین پر ٹوٹ پڑی،نوجوان شہید

کادونا میں آیت اللہ شیخ ابراہیم زکزاکی اور ان کی اہلیہ کی رہائی کیلئے ریلی، پولیس نے براہ راست فائرنگ کردی، 15 سالہ نوجوان شہید، درجنوں افراد زخمی
کئی مظاہرین زیر حراست،ابوجا میں بھی اسلامی تحریک کے کارکنوں کی ریلی،مظاہرین کا شیخ ابراہیم زکزاکی کے مقدمہ کی سماعت ملتوی کرنے پر احتجاج
ابوجا(نیوز ڈیسک) نائیجیریا میں پولیس ایک بار پھر شیعہ مظاہرین پر ٹوٹ پڑی،پولیس کی فائرنگ سے ایک نوجوان شہید اور متعددزخمی ہوگئے، کادونا میں اسلامی تحریک کے کارکنوں نے آیت اللہ شیخ ابراہیم زکزاکی اور ان کی اہلیہ کی رہائی کیلئے احتجاجی مظاہرہ کیااور ریلی نکالی،ریلی میں خواتین اور بچوں کی بھی بڑی تعداد شریک تھی، پولیس نے ریلی کے شرکا کو آگے بڑھنے سے روکنے کیلئے براہ راست فائرنگ کردی،جس سے 15 سالہ نوجوان محمد جواد لیمان شہید اور درجنوں افراد زخمی ہوگئے، پولیس نے کئی مظاہرین کو حراست میں لے لیا، ادھر دارلحکومت ابوجا میں بھی اسلامی تحریک کے کارکنوں نے احتجاجی ریلی نکالی،مظاہرین آیت اللہ شیخ ابراہیم زکزاکی کے مقدمہ کی سماعت ملتوی کرنے پر احتجاج کررہے تھے، مظاہرین اگوئی ارونسی شاہراہ پر جمع ہوئے اور عدالتی فیصلے پر احتجاج کیا،مظاہرین نے آیت اللہ شیخ ابراہیم زکزاکی کی رہائی کے حق میں بڑے بڑے بینرز اور پوسٹرز اٹھارکھے تھے،دوسری جانب نائجیریا کی پولیس اور فوج کی جانب سے آیت اللہ شیخ ابراہیم زکزاکی کے حامیوں کے خلاف کریک ڈاؤن کا سلسلہ جاری ہے جس میں ابھی تک ہزاروں افراد کو شہید، زخمی اور گرفتار کیا گیا ہے۔