ذی الحجہ سے پہلے محرم پالیسی فائنل ہوجائیگی،وفاقی وزیر

 اتحاد بین المسلمین اور امام حسین علیہ السلام کانفرنسز منعقد کی جائیں گی
 اسلام آباد (نیوز ڈیسک) وفاقی وزیر مذہبی امور پیر نور الحق قادری نے یقینی دہانی کرائی ہے کہ ماہ ذی الحجہ سے پہلے محرم الحرام سے متعلق پالیسی تیار کرلی جائے گی جس کیلئے داخلہ، مذہبی امور، صحت کی وزارتوں اور دیگر اداروں کو ہدایات جاری کر دی گئی ہیں ،سربراہ تحریک حسینیہ علامہ ڈاکٹر محمد حسین اکبر سے بات چیت میں وفاقی وزیر نے کہا کہ محرم سے پہلے فرقہ وارانہ اور بین المسالک ہم آہنگی کے قیام کیلئے تمام مسالک کے مرکزی قائدین اور مرکزی شخصیات کی سرپرستی میں اتحاد بین المسلمین اور امام حسین علیہ السلام کانفرنسز منعقد کی جائیں گی، علامہ محمد حسین اکبر نے کہا کہ محرم کی مجالس عزا اور جلوسو ں پر کسی بھی قسم کی پابندی کو قبول نہیں کیا جائے گا، ماہ ذی الحجہ سے پہلے حکومت ایس او پیز اور پالیسی سے شیعیان پاکستان کو آگاہ کرے، تاکہ ان کے درمیان پائی جانیوالی بے چینی کا ازالہ ہوسکے