اسرائیلی جارحیت میں 4 ہزار 500 سے زائد طلبا شہید

غزہ : غزہ اور مغربی کنارے میں سات اکتوبر سے جاری اسرائیلی جارحیت میں 4 ہزار 500 سے زائد طلبا شہید ہوچکے ہیں۔ فلسطینی وزارت تعلیم کے مطابق غزہ اور مغربی کنارے میں صیہونی فورسز کے ہاتھوں 4 ہزار 510 طلبا شہید اور 7 ہزار 911 زخمی ہوئے۔ مغربی کنارے میں 41 طلبا شہید اور 282 زخمی ہوئے، مغربی کنارے میں اسرائیلی فورسز نے 85 طلبا کو گرفتار کر رکھا ہے۔ رپورٹ کے مطابق غزہ میں اسرائیلی بمباری میں 231 استاد اور اکیڈمک کارکن شہید اور 756 زخمی ہیں، جبکہ مغربی کنارے میں 6 استاد زخمی اور 71 گرفتار ہیں۔ فلسطینی وزارت تعلیم کے اعداد و شمار کے مطابق اسرائیلی فوج نے غزہ پٹی کے 346 اسکولوں پر بمباری کی۔56 اسکول اقوام متحدہ کے ادارے کے زیر انتظام تھے۔ اسرائیلی بمباری سے 83 اسکولوں کو شدید نقصان پہنچا، 7 مکمل تباہ ہوئے۔ مغربی کنارے میں اسرائیلی فورسز، یہودی آبادکاروں نے 38 اسکولوں کو شدید نقصان پہنچایا۔ اسرائیلی فورسز نے غزہ کی 90 فیصد تعلیمی عمارتوں پر بمباری کی 133 اسکولوں کو پناہ گزینوں کیلئے کیمپ میں تبدیل کیا گیا ہے۔ مغربی کنارے میں 55 سے زائد اسکول اسرائیلی فورسز، یہودی آبادکاروں کے حملوں کے باعث بند کردئیے گئے۔