آئی ٹی سسٹم میں خرابی، دنیا بھر میں سائبر نظام درہم برہم

کراچی: عالمی سطح پر مائیکروسوفٹ کے سسٹم میں خرابی آنے کے سبب دنیا بھر میں سائبر نظام درہم برہم ہو کر رہ گیا۔ دنیا بھر میں آئی ٹی کمیونیکیشن میں خلل آنے کے باعث فلائٹس گراؤنڈ کر دی گئی ہیں۔ پروازوں کی بکنگ، مسافروں کے چیک ان اور ٹکٹنگ کے نظام میں بھی خلل پڑا۔ ایئرپورٹس پر ہزاروں مسافروں کو شدید دشواری کا سامنا کرنا پڑا۔ بینکوں کی ٹرانزیکشن رُک گئیں۔ اسٹاک مارکیٹوں میں بھی کام متاثر ہوا۔ میڈیا کے اداروں کی نشریات میں تعطل آیا ہے۔ اسکائی نیوز سمیت کئی ٹی وی چینل آف ائر ہوگئے۔ دنیا کی کئی بڑی ایئرلائنز، میڈیا کمپنیوں، بینکوں اور ٹیلی کام فرمز نے اپنے آپریشنز میں خلل کو رپورٹ کیا ہے۔ ٹرین سروس بھی متاثر ہوئی۔ سائبر سیکیوریٹی فرم کراؤڈ اسٹرائیک کا کہنا ہے کہ تھرڈ پارٹی سافٹ ویئر اپ ڈیٹس سے ونڈوز آپریٹنگ سسٹم متاثر ہوا۔ نیوز ایجنسی رائٹرز کے مطابق خرابی صرف ان کمپیوٹر سسٹم میں آئی ہے جہاں مائیکرو سافٹ ونڈوز استعمال ہورہی ہے، لائنکس اور میک کے سسٹم میں اس خرابی کے کوئی اثرات مرتب نہیں ہوئے۔